Thih nak chung in a luat mi Haralan Part-1

Nikhat cu Haralan le thongtla a hawi le pawl ti cun tikulh i rian an ttuanter hna lioah cun ruahpaklo khin ti a hung lian ciammam i, an i ringmanh ti lo i tihrah nih cun Haralan cu a fenh i a angki fual he a kedanh he a fenh. Cu pinah a kik tuk fawn i tthatthi in a cawl kho ti lo. A hohmanh chanhtu ding zong an um lo i cuticun ti nih a fenh thluahmah ko i minung nunnak ding lam khi a um ti lo. Ti cu vur (hawhra) he a si chih caah a kik tuk i a kut le ke zong a duhning in a cawlcang kho lo.

Cu pinah a kedanh le a angki cu a rit tuk a neh tuk i cawlcangh aa harh tuk. Haralan nih zeiti hmanh in nun khawh lai aa ruat ti lo. Cucaah cun “Bawipa, ka bawm tuah” tiin thla a cam tthan. A thlacam dih khap ah thazaang a von ngah tthan i a tha um dihlak in a von leuh i biatakte in a hun ttang kho i cutincun tlangah a hung chuak kho tthan. Nun khawh lai cu aa ruah ti na loin Bawipa nih a khamh tthan caah Bawipa sinah cun lunglawmhnak bia chim in thla a cam colh. Hi ni hi Christmas lai December 24 a si.

A thaizing cu Christmas ni a hung si cang i Haralan nih thong chung cun a nupi le a fale cu damte in hmuh tthan khawh cu a zum ti na loin a ngai tuk hringhran hna i, “An dam lio hna a si ve hnga maw? Damte in hei um hna selaw, nihin Christmas ni hna hi nuam in an hmang kho hnga maw? Ruth, Paul le Rhodha a tu liote ahhin zeidah an tuah ve hnga?” ti khua a ruah lioah cun amah le amah cu “Hitin ka ruah len awk a si lo. Kei cu ka hawi le midang a si khawh chungin a hnemtu ding ka si” tiin lung can aa pe tthan.

 

Be the first to comment

Leave a Reply

Your email address will not be published.


*