Paral tha Part-1

Haralan zong nihcun Thlithup Khrihfabu pawl nih ram leng leiin bawmhnak a herh tuk ti a theih caah Sweden kal khawh nak dingah a si khawh chungin aa zuam ve. Haralan caah cun Thlithup
Khrihfabu aiawhtu a si pinah a nupi le a fale sin kalnak caan ttha le caan rem a si fawn. Haralan nih cun Thlithup Khrihfabu biaceihning le an khuakhaanning vialte kha a nupi Ruth cu a hei chimh colh ve. Ruahlo piin nikhat cu Haralan nih Bulgaria Cozah zungah vaa langhnak ding cakuat a hmuh. A kal lai ah Haralan cu Baba Maria nih, “Ram dang kal khawh nakding passport kongkau a si ko lai. Zokzok in va kal tuah hnik” a ti. A rannak in a va kal colh ve. Zung a hlat lem lo caah a va phan colh ko. Sihmanhselaw zung chung i a vung luh lioah khin bawi pakhat a hmuh. Cu pa muihmai cu a von hmuh bak khin a thinhung tuk ti cu a theihthiam colh. Cu pa, officer pa nih cun, “Haralan Sweden ah a ummi na fanu nih Bulgaria ram chungin na chuah khawh nak dingah Russian cozah (Russian Primier) sinah ca a kuat. Hi a ca`ialmi hi na hmu maw? hi ca nih hin an chanh khawh lai tiah maw na ruah?” a ti. Sihmanhselaw, Haralan cu holh lo tein a um ko lioah cun a bia cu a von peh tthan i, “Haralan na chung le cu hi bantuk ca (application) hi voikhat hmanh ttialter ti hna hlah. Zeitik hmanh ah ram dang kal khawhnak (passport) cu kan pe lai lo. Ka thih pah hmanh ah kan pe lai lo! Zung chung hin a rannak in chuak zokzok! Voikhat hmanh ra `han ti hlah!” tiin a raak (hrocer). Haralan cu zei bia kaa khat hmanh chim kho loin a chuak colh. A hnabeiseinak vialte cu a tlau dih i lungdong zaanguai in inn lei ahcun a ttin.

Lampi ah cun tihin khua a ruat pah thluahmah, “Kei hi ka kal khawh lo ahcun a ho cu dah Thlithup Khrihfabu aiawh cun a kal kun ne hnga? Ram ttha, khrihfa zalonnak ram i a ummi aa hngilhmi hna tthangtu dingah a ho cu dah a kal kho kun ne hnga?. Hi pinah kei ka caah cun ka chungkhar he zong tontthannak cu hi vawlei ahhin a um kho ti ngai hnga maw?” tiin khua zakip a ruat. Inn a phak cangka in, “Maw Bawipa Pathian, Thlithup Khrihfabu chung mino vialte hna hi Bible rel awk an ngeih ttung lo, zeitindah an um lai? Atu i Bible a ngei lomi vialte hi zeitindah kan ti ne hna lai? Bawmhnak khuazei indah kan hmuh khawh lai?” tiin mitthli he thla a cam. Cuhnu tlawmpal ah cun Baba Maria le a hawile cu an ra. Haralan nih cun zung i a thil tonning cu lungdong ngai in a chimh hna. Baba Maria hi Pathian aa bochan tukmi a si i a nih a chuak salam i, “Ha! Ha! Cupa bia chimmi cu zeihmanh ah ka rel lo, zei san hmanh va tlai hlah, Pathian nih a ka chimh cang. A rauh hlan ah Sweden ah cun na kal lai. Pathian lam cu a hohmanh nih an kham kho lai lo.”a ti. Haralan cu zeiti holh awk a thei lo. Nihnih hnu ah khin Bulgaria Communnist Party hruaitu bawi pawl cu a herh ngaingaimi meeting an tuah.

Be the first to comment

Leave a Reply

Your email address will not be published.


*