Holh phundang le Biatak bia Part-2

Mirang holh cu a sullam zeihmanh an hngalh lo caah zeihmanh chim loin an kaltaktawn hna. Cu ruangah cun mi tampi nih Jesuh Khri khamhnak cu an tinco. A tingco lomi zong Haralan bia a ngaimi paoh nih cun thluachuah an hmuh i an ziaza ttha lomi tampi an tthinh khawh. An hawipa pakhat cu Pathian a bia lomi a si bantuk in a holh phun a chia tuk hringhran i a holh kip ahhin, “Va thi! Va pul! Kan nawn lai!” ti bantuk rumror in a holh tawnmi a si. Nikhat cu cupa cu Haralan sinah a ra i, “Zei thil dah ka cungah a tlung ka theithiam lo, volhpamh le chiatserh ka hman tuk tawnmi kha atu ah cun ka tthinh cang ka hmang ti lo” a ti. Cu bantuk cun ruahlo pipi in mi dang zong cu Haralan sinah cun an ra hna i, “Pastor, Khrihfa si ve ka duh” an hung ti. Cuticun Haralan thawngin Communist thong chungah cun Thawngttha cu a karh chin lengmang. Mino, tlangval pawl sinah Haralan nih Pathian bia a chimh cawnpiak hna ti cu Communist thong bawi pawl nih an von theih than hoi. Office ah a rannak in Haralan cu an von kawh tthan.

Thong bawipa nih, “Haralan, bia si lo lo na cawnpiak hna ruangah mi tampi nih thong khaan chungah thla an cam. Pathian bia fihnung tukmi hi heh tiah an ceih hna. Zeitin dah tuah na timh hna?” tiin a von hal. Haralan nihcun, “Saya, kei cu na ka theih bantukin pastor ka si. Mingiatu zong ka si loh. A hohmanh ningcang loin ka hruai hna lo, mi dang a ho tthatlonak hmanh ka chim lo i Communist Cozah dohnak bia zong ka chim bal lo. Pastor ka si bantukin Pathian bia ka chim ko. Ka thih hlan lo ka ngol lai lo i ka chim peng ko lai” a ti.

Cu ruangah cun thong bawipa cu a thin a khenh tuk hoi i, “A ran khawh chungin hi pa hi hremnak khaan ah khan va chia tthan u” a ti. Cuticun a hlan bantuk khan hremnak khaan ah cun an chiah tthan hoi. An hremning cu a faak tuk hringhran i ni sawmthum (30) chung rawl loin ti lawng din dingin an chiah tthan. Sihmanhselaw Pathian nih a nunnak cu a huhphenh tthan i cu tluk hremnak zong cu a tuar thlu khawh tthan.

Be the first to comment

Leave a Reply

Your email address will not be published.


*