Harnak chung in nunnak biaktak Part-2

Cu pinah a thleh lio a von hmuh ruangah cun a ngaihchia tuk. Haralan nihcun zeitindah a ngeihning a si hnga ti kha a hal i anih nihcun thong dangin an von tthial ka ahkhan amah khaan chung hnawm lakah a rak um ti kha a chimh. Haralan nih cun, “Hi cauk hi zaangfahnak tein ka pe” tiah a hal. Sihmanhselaw cu pa nih cun tangka a ngiar ruangah, “Ka siang lo, ka rel lio mi pei a si cu” a ti. Khua caan ah cun Haralan zong cu a thli in lenglei Khrihfami nih Haralan cu tangka tlawmpal tete an pek ve tawn. Cun, Haralan nih cun cupa cu, “Hi cauk hi ka pe law, ka ngeihmi dih lakin ka tangka kan pek lai” a ti. Cupa nih cun aw a ti i Haralan nih cun tangka ngeih chun, a ngeih mi dihlak cu a pek i Bible cu aa laak. Bible te cu a ttaang ah aa pom i Pathian sinah lunglawmhnak mitthli he lunglawmhnak biachim in thla a cam.

Haralan nih cun hitin a ti, “Kum nga chung pumsa lei tihal rawlttam nakin thlarau lei tihal rawlttam a har deuh”. Haralan hi kum 1926 i Khrih he pehtlaihnak a ngeih ni thokin Communist pawl nih an tlaih ni tiang Bible he aa `hen bal lomi a si. Hi Bible a ngeitupa min cu Stoil a si. Haralan, “Hi bible cawknak caah hin ka ngeih mi dihlak zeihmanh uinak ngei loin Stoil sinah ka pek, hi pinah hin Stoil nih tangka lawng si loin ka kut maw, ka ke maw hi Bible man caah hin ka hal sehlaw ka pek tthiam ko lai” a ti. Haralan nih cun Bible te cu thong khaan chung i a chiah peng ahcun thongtla congtu pawl nih an hmuh lai i an hrawh piak zau lai ti a theih caah nifatin an rian`uannak hmun ah `ha tein a thuh tawn. Cun, caan rem a ngeih paoh ah a thli tein a rel tawn. A caan ah cun rian`uan i an lawi pah ah a thlite in a lak i thong khaan chungah cun aa lawipi. Zan tlai hnu ah a hohmanh theih khawh lo dingin a thlite in a rel tawn.

Be the first to comment

Leave a Reply

Your email address will not be published.


*