Harnak chung in nunnak biaktak Part-1

Haralan cu khur chung thongin a chuah hnu cun a zalong ve deuh cang i caan rem a hmuh paoh ahcun thongtla a hawi le cu Pathian bia a chimh tawn hna. Thong-inn khaan cu Haralan caah cun
Biakinn a si cang i a si khawh chungin thongtla pawl cu Pathian bia a cawnpiak tawn hna. Nikhat cu thongtla pakhat pa nih Haralan cu a thawh i, “Pastor, bia na kan chimhmi kha ttha tein ka ngaih i ka lung ah a lut tuk! Jesuh na timi kha kei zong a rian ttuan ka duh ve, a rian ka ttuan ve lai” a ti. Cu bia a von theih cun Haralan cu lunglawmhnak in a khat. Thong chungah siseh rian a ttuannak hmun ah siseh a remnak paoh ahcun Pathian bia cu a chimh cawnpiak peng hna. Nikhat cu an rian`uannak hmun ah Haralan le thongtla a hawipa cu thla an camtti lioah thongtla congtupa cu rang a von i cit i an sinah cun a rak ra i thla an cam tti lio cu a von hmuh manh hna. “Kha ka ahkhan zeidah nan tuah peng?” tiin a von raak len hna. Haralan nihcun fawizaang tein, “Facang ttuan kan zoh” tiin a leh. Pathian nih Haralan cu a umpi peng i Jesuh kehram ah minung tampi thongtla a hawi le cu a hruai hna. Sihmanhselaw, Pathian bia tihal in a halmi hna caah cun Bible rel ding an ngei lo. Cucaah cun Bible ngeih khawhnak dingah Pathian sinah thla an cam. Pathian cu zei bantuk thir thong hmanh nih a kham kho lo ti cu fiang tein an theih.

Voikhat cu Haralan nih a umnak khaan dot i a ummi pa nih cauk pakhat a ngeih a theih. Cu cauk cu a thleh liote kha a hei hmuh. ttha tein a hei zoh i Biakam Thar cauk, Bible a rak si ziar ko. Haralan nihcun cauk cu a hei banh i a lak. Sihmanhselaw cupa nih cun a rannak in chuh tthan a timh. Haralan cu Bible a hmuh lonak kum nga a si cang caah Bible cu a ngai tuk cang.

Be the first to comment

Leave a Reply

Your email address will not be published.


*