Biatak chuah nak Part-1

Nikhat cu Haralan nih Thlithup Khrihfabu pawl nih a thlithup in Bible an chuah ti thawng a theih. Cu an chuahnak hmun cu Sofia khuapi lengah a si. Haralan cu a va kal ve. An chuahnak cu inn
tang i a muihnak hmun ah a si i, cuka i rianttuantu pawl hna cu mino lawngte an rak si. Cattialnak seh zong a um lo i Bible cu an kutin an tlen chom. An tlenning cu pakhat nih bu hnih Johan le
Luke, heiti bantukin an i phaw hna. Anmah le an ttuanvo cio an dih tikah cucu an fonh i ttha tein tthim in an tthit i a lengphaw zong ttha tein saphaw in an ser. Cu hnuah cun khuapi chung i thlithup Khrihfabu sinah an kuat tawn hna. Sihmanhselaw, cu rian cu a har tuk hringhran i nikhat ah suimilam 12 chung diinlo bakin an ttuan ko nain kumkhat chungah bu 25 lawng an chuah khawh.
Communist pawl nih an theih sual ahcun ttihnung ngaingai a si fawn. Zankhat cu pumh dih ah khrihfabu member pakhat nih Haralan cu Bible pakhat kha a von hmuhter i cu Bible cu kut in tlen chommi si loin seh in an ttialmi khi a si.

Haralan cu a khuaruahhar tuk i, “Khuazei ahdah na lak khawh?” tiin a hal. Cu nu nihcun, “Sofia khua pin leiah khin mi tlamtling lo (Pum tlamtlinglo) a um i cu nih cun a hlan i cattialnak seh (Type Writer) chiami a remh i cucun hihi a ttial mi a si. Amah cu mirang holh a thiammi a si. Bible cu a leh chom in hiti hin a ttial. A ttial thlu khap ah Bulgaria hmun kipah a kuat hna” a ti. Haralan nih cun a umnak cu ttha tein a dothlat i cupa umnak ah cun a va kal tthan. Cupa cu ke tthalo amah te hmanh in innleng zong a chuak kho lomi a rak si. Sihmanhselaw a caan vialte cu Bible lehnak le ttialnak ah a hmang tawnmi a si. Bible chuahtu pawl nih Bible cu an si khawh chungin chuah i zuam ko hna hmanhsehlaw kumkhat ah an chuah khawhmi cu a tlawm tuk i Bulgaria ram mizapi caahcun tangka thong khat a herh tukmi ca i tangka fang khat lawng pek bantuk a si. Haralan cu pastor a si bantukin nungak tlangval pawl le mi tampi nih a tu le tu, “Pastor, Bible kan herh tuk! zeitin dah kan ngeih khawhning a si lai” tiin an hal lengmang. Haralan nih cun zeitin tiawk a thei ve lo.

Be the first to comment

Leave a Reply

Your email address will not be published.


*