Aristotle tuabia Part-2

Cuticun Aristotle nih Pillas pawng Miaza hmun ah sianginn a dirh. Mah hmun cu hmawngtang a si i Lasii pawl nih lente an i celhnak hmun a si. Hi hmun ah Alexander le Greek mirum fa hna cu fimnak an cawng. A cawnpiak liomi hna a sianghnakchia pawl nih an cawnpiak cu an tihzah i an upat taktak. Pathian bantukin a hmai ah an khun tawn. Alexander belte nih cun Aristotle cu a fimnak le a thiamnak zeitluk dah a si tiah a theih ko nate in Pathian bantuk in upatnak pek i, a hmai ah kunpiak cu a herh a ti lem lo.

A sianginn a chuaktak hnu bawi a si hnu zongah a cawnpiak Aristotle cu Alexander nih a tlaihchan i upatnak sangbik a pek.”Kapa sinin nunnak cu ka hmuh i Aristotle nih mitling ka si khawhnak ah theihnak a ka pek,”tiah Alexander nih a ti. Aristotle nih biology a cawn i (Biology cu Scinece phunkhat, thilnung, thingram lei cawnnak a si) hlathlainak (research) a tuah lioah Alexander nih amah bawmtu dingah minung thongkhat a pek. Mah hna nih thilnung umtu ning an hlathlai hna. Hi minung pawl nih Aristotle sinah an chimh chin tawn. Hi pinah Alexander nih phaisa le thilri tiangin a bawmh rih.

Iraq ram ah Alexander cu a thi i cu ruangah Atheni khua cu Aristotle caah humhinnak hmun a si kho ti lo. Macedonia bawi tanhtu a si tiah sual an puh colh. Greek pawl thinlung that lo ning le an zirning kha a hngalh peng fawn. Sual i an puh colh ding zong kha a hlankhante in a rak theih cia. Socrates cungah thil a rak tlungmi kha a theih peng fawn. Hlemlock (Siivai phunkhat) din ding le a duh fawn loh. Cu caah Atheni khua in a zam. Erboa rili kam ah a ummi Chalcis ah khua a va sa i B.C (322) ah a nunnak a liam.

A bia le hla lakah roling taktak a simi hna cu Ethics (Nunning Ziaza lei) le Politics (Cozah hruaining/ukning le ramkhelnak) hna an si. Aristotle mifim cawnpiaktu tha a si i,a min hi vawlei a hmun chung cu chimrel a dai ti lai lo. Chanthar mino caah Pathian nih thil lianngan a pekmi lakah Aristotle he a si peng ko lai.

Be the first to comment

Leave a Reply

Your email address will not be published.


*