Alexander The Great Part-3

Asinain, a ri tuk caah amah tu a tlu diam ai. Alexander nih cun nihsawh buin “Ngai hmanh uh,Europe in Asia tiang kal ai timi pa cu thutdan pakhat in pakhat va kal dingin tlu ko khih,”tiah a ti. Alexander cu B.C. 336 ah kum 20 a tlin dih lo deuh ahhin Macedonia uktu a si i, bawi a si bakin amah dohtu ding ral a ngei colh. Trace, Thebes, Illyria le Thessaly techna pawl cu amah ram uknak tangin an chuak i, Alexander cu an doh. Mah hi ram hna cu Philip kuttang ah a rak kun cangmi an rak si hna.

Persia ramuk bawi ram a simi ram minthang taktak mi va doh dingah chuah hlan ah Tracian hnale, Illyrian hnale, le Thebes pawl hna cu adang cio in a tuk hna i a va tei hmasa hna. Thebes ahhin minung 60000 a thah hna. Nu le hngakchia an tlaih hna i sal ah an zuar hna. Mah tihin thil a tuahnak a ruang cu amah sin in thencheunak thinlung le dohnak a ngeimi an um i, cu hna nih tin hna seh tiah a tuahmi a si.

B.C. 334 ah Raangcung ralkap doh dingin an kal hna. Persia Ralkap hna nih Granicus tiva kam in an rak bawmh hna i doh an rak timh hna. Li le Thal ruah bangin a surmi cu pah chih thluahmah bu in an lan thluahmah. Cu caan ah cun ke ralkap zong an va kal ve i raldohnak fakpi a chuak.

Alexander cu ral hmaisuang ah a kal. Aphaw le an lukhuh kamkhat lei a rangmi in Persia hna nih awlsam te in Alexander te an si tiah an theih colh hna. Amah Alexander bak thah hmasa dingin an i tinh caah a dirhmun a har tuk tiah a hawipa ‘Cleitus’ nih a va chanh. Alexander hmai ah cun khuapi kulh a ngeimi hna ram cu an kun dih hna. Khulrang tein biachahnak a tuah tawn caah a ral hna cu an i ralring manh tawn lo i,a tei tawn hnanak a si.

Be the first to comment

Leave a Reply

Your email address will not be published.


*