Aithup Palik sinah mi thawngtha

Kum 1948, September thla hramthok ah Haralan cu phunglam theitu Manoff sinah an tthial tthan i cu pa nih cun biahal lawng si ti loin a konglam cu zan fatin in office ah cun a ttial in a tialter. Cucu Haralan caah cun Jesuh konglam tialnak caan ttha tuk a rak si.A tam khawh chungin amah konglam pinah Jesuh dawtnak kong cu a ttial chih. Zanfatin ca ttial ding cu an pek i zan khat ah tlap sawmli hna a ttial tawn. Cuticun tlap thong hnih renglo a ttial manh. Caan rem tukmi pakhat cu Bible cawnnak Bile Institutes in Danzig kong cu an ttialter i cu an cawnmi a herh khunmi pawl cu tampi a ttial chih hna. Sihmanhselaw cu zong cu a duh ti lo i ttial ti lo dingin an ti tthan. Nikhat cu Haralan an chiahnak khaan chungah cun tlangval pa Milko, kum 23 mi cu an von thlak ve. Cuticun thong chung i an von khumh bakah cun, “Zei sual lo mi`ha ka si….zei sualnak hmanh ka tuah lo…communist hi a ttha tuk ko..” a ti .Cucu thiamco a duh tuk caah a si. Communist hruaitu (Leader) Lenin zong cu a si khawh chungin Secret Police pawl theih khawh dingin a conglawmh, a fak len. Sihmanhselaw zei san a tlai hlei ti lo i lungdong zaanguai ngaiin Haralan pawngah cun a um. A hramthok ah cun ttha tthi zongin a ngai duh lo.

 

Sihmanhselaw Haralan nih cun a chimh chih peng i ttha deuh in a von ngaih cang i khamhnak thawngttha cu a tinco vei cu thong chungah cun an pahnih in Pathian sinah thla an cam tti tawn. Tlangval pa Miltko cu hnangamnak le lunglawmhnak in a khat. Anih caah cun thonginn cu Pathian thluachuah zungzal nunnak a hmuhnak hmun a si. Haralan zong cu Bawipa nih thong chung zong ah a rian a ttuanter ti fiangte in a hngalh caah aa nuam tuk ve. Cuticun nikhat cu an umnak innka cu an von hun i thongtla congtu nih cun ca a von i put i cu ca cu Miltko chuahnak ding ca a rak si. Milko nih cun a zum lo tuk. Sihmanhselaw a chuahnak ding ca cu a rak si taktak i tlawmpal ah cun a chuak colh. Cuticun a chuah lai ah cun Milko nih cun, “Pastor, hika hmun hi nangmah thawngin Pathian ka hmuhnak hmun a si, ka thih tiang Amah Pathian rian lawng ka ttuan lai” a ti. Haralan cu a chuah taak hnu cun amah te lawng umhar ngaiin a khaan chung ah cun a um cang. Cun nikhat cu thong a tlaknak khaan chung thlalangawng (window) in khua a cuan i thilsernak (Factory) inn cungah khuaruahhar ngaimi thil a hmuh. Cu thil a hmuhmi cu Vailamtah tung a si. A thok tir ah cun ni (sun) nih a kahmi thladem sawhsawh a si rua tiah a ruah. Sihmanhselaw fiangte in a von zoh tthan i Vailamtah tung a si ko. Cuti khuaruahhar ngaiin a zoh lioah cun fiang tukin aw a theihmi cu, “Ka fapa, hihi na Vailamtah tung naa put dingmi cu a si. Tampi teminnak tuar dingin i ring ko rih” tihi a si.

 

Cu cangka cun a lungchungah hla pahnih tuarnak hla a hung chuak colh. Pathian sinah thla a cam colh. Cu hnu tlawmpal ah cun tanglei khaan ah hrem dingin an kalpi colh. A hlan bantukin rawl an pek duh lo pinah tii zong an pe duh ti hoi lo. A ruahnak vialte le zumhnak vialte cu hrawh dih cikcek an duh i sihmanhselaw an hrawh khawh lo caah an thin a hung chin lengmang. A zansarihnak ah cun thong bawi Manoff nih cun a tthawng ngaimi pa Dimitri an timi cu Haralan hremtu dingah nawl a pek. Dimitri nih cun Haralan cu a liangin a von tlaih i a von thin len. Ccu lioah cun Haralan cu khuaruahhar ngaiin thazaang tthawnnak a von ngei i takpum cu thing le lung bantukin a hak dih. Cun Dimitri nih a thongh len zongah zeihmanh fah zong a thei kho lo i, cun a hnarah voithum a von thongh tthan, a fah cu a thei lo nain a hnar thi tu cu thlurthlur in a chuak ve. Haralan nih cun a ven zong aa veng duh lo i a hmai cu aa chit zau i, “Na duh chungin ka thong, na duh tawkin ka thong…..ka thong law na theihthiam te lai…” a ti i Dimitri cu a naih chih thluahmah. Dimitri cu a khuaruahhar tuk i Haralan cu a ttih cang. A hnulei aa her i a zaam. A zaamnak ah cun tthutdanh aa pah i a lukhawloin `uang ah cun a tlu. Cu hnu zong ah cun Haralan nih a va fuh chih `han. Sihmanhselaw cu hnu tlawmpal ah cun Haralan cu a thazaang tthawnnak nih a kaltak tthan. Cucaah cun thabaa ngai khin cawlcang kho loin a tthu colh ve.

Be the first to comment

Leave a Reply

Your email address will not be published.


*